آنه أعترف باسم اثنين

مولاتي يا زهراء
آنه أعترف باسم اثنين إلهن سهارى أجفوني
زينب مساكنها العين زهراء نور أعيوني
حوراء مولاتي يا حوراء
زهراء مولاتي يا زهراء
--
آنه بس باثنين قلبي رف مثل جنح الحمام
زينب وأمها الوديعة فاطِمة خير الأنام
أحلى اسمين أبذكرهن تطمئن روحي أوتنام
من يمر طاريهن أفرح وأشعر أبراحة أوسلام
هام أوعشق هالأسمين من المهد دلالي
زينب الحرة أخت أحسين والزهرة أم الغالي
حوراء مولاتي يا حوراء
زهراء مولاتي يا زهراء
** *
آنه للزهراء روحي شمعة معلوقه أوتذوب
هيه نور أليضوي دربي من يحل وقت الغروب
لو ذنب حب آنه أقدسه عنه ما أعذل وأتوب
أشلون أتوب وحبها كوثر يغسل ويجلي الذنوب
هالكوثر الباري أنطاه للمصطفى والدها
فاطِمة الكوثر معناه ميذوقه اللي يعاندها
حوراء مولاتي يا حوراء
زهراء مولاتي يا زهراء
** *
أحتار اللي يوّصفها زينب عنها زينب شارد أقول
بت علي أوعباس أخوها وأمها تدرون البتول
إلها صورة أبوسط عيني تغفى عيني وما تزول
عن صبرها وعن علمها الحسبة من أشرح تطول
للصبر صارت عنوان والشيعة تفخر بيها
صورتها آية قرآن بعيوني أمخليها
حوراء مولاتي يا حوراء
زهراء مولاتي يا زهراء
** *
شاعر اوهذا أعترافي عالورق خطّ القلم
آنه بس لأثنين قلبي ضل يرف مثل العلم
فاطِمة وزينب عقيلة هاشم أصحاب الشيّم
رفّ خجل وإجلال قلبي إلهن وأقسم قسم
من المهد ولهاليوم ما فارقن أشعاري
وأشهد ألضلعي أومفطوم لو يمر لي إلهن طاري
حوراء مولاتي يا حوراء
زهراء مولاتي يا زهراء
** *