نفرح لابو السجّاد= و العبَّاس و العبَّاس
و ابزينة العُـبَّاد= و العبَّاس و العبَّاس
خلّونه إيد ابإيد=ليلتنه ليلة عيد
- - - - - - -
يالحضرتوا الليله تحيون الحـفِل= باحله المواسِم
بالصلاة اعلى الرسول و نستهل= هذي المراسِم
لا أحد يعتذِر آنه منشغِل= واجب يلازم
لجل ابو اليمَّه و إبنه و الأجِل= بدْر الهواشم
مولِد أبو الأحرار= و العبَّاس و العبَّاس
يا محله هالأقمار= و العبَّاس و العبَّاس
و زين العباد انريد=ليلتنه ليلة عيد
- - - - - -
على الفطره جينه من هلّ الشهَر= طبْع و سجيَّه
الگلب يخفگ شوگ وايدّگ الوتَر= يهدي التحـيَّه
و الله هنياله الذي اويانه حضَر= هاي المسيَّه
و الذي ايعادينه خليشبَع قـهَر= ذاتـه رديَّه
للعتره هالأعياد= و العبَّاس و العبَّاس
و ابكل زمن تنعاد= و العبَّاس و العبَّاس
خليعتلي الترديد=ليلتنه ليلة عيد
- - - - - - -
جينه ننسه النوح خلننسه الحزِن= و الليله گمره
للصبُح ياريت ما نغمَض جفِن= بافراح العتره
مو حرام و عيب بالحُب لو نجِن= ابضنوة الزهره
حبنه فايت بالدليل ابلا إذِن= و لازم نِظِهْره
ما ننسه والله احسين= و العبَّاس و العبَّاس
هاي احنه متعنّين= و العبَّاس و العبَّاس
نحضر ابكل تأكيد =ليلتنه ليلة عيد
- - - - - - -
كل مُوالي و شيعي طيِّب مرضعه= ايشاركنه صحنه
نشْفَت الدمعه الحزينه و دامِـعه= دمعة فـرحنه
كلمن ايساومنه فكره ايراجــعه= وانگـلَّــه إحنه
هالمسير انلِزْمه دوم انتابِـعه= و لو بيه ذَبِـحنَه
نقسم ابراعي الزود= و العبَّاس و العبَّاس
ما نبخل ابمجهود= و العبَّاس و العبَّاس
وما نهتم ابتهديد= ليلتنه ليلة عيد
- - - - - - -
خدمة الأقمار إلنه مفخَرَه= و اهمه سُفنَّه
و هالسُفُن بيها نجاة الآخرَه= غيرهم اشعِدْنه
إي و حگ اچفوف سبْع الگنطرَه= نقسم قسمنه
للأبد هيهات و الله انغيِّره= هذه عهـدنه
يوم الحشر مضمون= و العبَّاس و العبَّاس
ويَّه الحسين انكون= و العبَّاس و العبَّاس
خاليصدَح الغِرِّيد= ليلتنه ليلة عيد
- - - - - - -
رضا عزيز
ليست هناك تعليقات:
إرسال تعليق